تعلمى الميكب من البداية للاحتراف ...بسعر خاص جداا

تعلم الميكب من البداية للاحتراف 

🔻🔻🔻

🔽🔽

🔽

معنا هتبقى ميكب ارتست وتحققى حلمك .,

هنعلمك ازاى تفرقى بين نوع البشرة 

وتتعاملى ازاى مع كل نوع بشرة 

تعلمى لف الطرح للمناسبات والافراح 

الكونتور والهايلايت 

ازاى تختارى الفاونديشن 

هنوفرلك كل الادوات اللى هتحتاجيها 

كل ده والسعر مفاجأة 

وفى 5 ايام فقط تقدرى تبقى ميكب ارتست وهتحصلى معانا على شهادة معتمدة 

من المركز التجميلى العالى بالشرق الاوسط 

وهنوفرلك الموديل اللى هتطبقى عليها 

ده غير اننا هنسوقلك على الفيس بوك ونعملك فوتوسيشن

:

:

:

للمزيد من التفاصيل 

كل الكلام اللى فات ماهواالا نصب وضحك على البنات ... 

فعلا الكورسات اصبحت سلعة وتجارة لجمع الاموال مستغلين حاجة البنات واقبالهم على الامر .., لنجد بذلك فرصة كبيرة فى انتشار كورسات الميكب على السوشيال ميديا خاصة 

وكلام مدروس يشدك عشان تتصلى وتحجزى معاهم 

********

انا هحكى عن تجربتى الخاصة بالموضوع ده تحديدا

لانى كنت ضحية للأمر ..

فالبداية الموضوع كان فى دماغى لانى اصلا مهتمه بالميكب وكانت لدى محاولات لعمل الميكب فالبيت وامام تسريحتى 

وكنت بعلم نفسى بنفسى وبحاول اتابع التطبيقات على السوشيال ميديا بشكل عام 

لحد ما كبر الموضوع فى دماغى جداا نتيجة الاعلانات الكتيير على الفيس بوك بخصوص كورس الميكب والصور المغرية اللى تشدك وتحسسك بفارق النتيجة بين البنت قبل وبعد واد ايه الموضوع ده فرق معاها فاللوك ... وطبعا بيحصل انبهار بالنتيجة ويبدأ عقلى الباطن بتخزين الصورة والاقى نفسى بشكل تلقائى باخد سكرين شوت للاعلان ... لدرجة انى عملت فولدر بكل الاعلانات وبدأت افاضل بينهم ... وكان الامر فالنهاية انى حجزت مع ميكب ارتست مشهورة " اميرة غازى " 

المفروض انها بنتاخد كورسات مع المكيب ارتست " معصومة " 

ولكن اللى لاحظته : 

*  اهتمامهم الكبير بجمع الفلوس 

* الموضوع لم يكن منظم بالمرة .. وكل اللى اتكتب فالاعلان لم ناخذه للأسف واللى كانت بتشرح ممكن تكون شاطرة فى الميكب بس مش عارفة توصل المعلومة للناس .. احنا حفظنا ولكن لم نفهم والنتيجة اللى مش هقدر انساها انى لما بدأت فالمجال جاتلى عروسة بشرتها دهنية جدااا وكانت الصاعقة ان الميكب جير ولم يثبت على البشرة .. لاننا لم نتعلم كيفية التعامل مع البشرة الدهنية وتهيأتها للميكب 

* الادوات اللى قالوا انهم هيوفروها ..كنا بنخطفها من بعض لان هما كانوا جايبين على الاد والكواليتى بتاعتها رديئة جداا ورخيصة .. والفرش الكل كان بيستخدمها فى نفس الوقت وتتنقل من بشرة لبشرة 

* يعنى ايه نتعلم ميكب فى 5 ايام او 4 حصص او حتى شهر .. المكيب " علم " زى كتيير من العلوم يعنى مش ممكن نتعلم الانجليزية فى 3 ايام ولا حتى 3 شهور .., لان الموضوع اكيد يحتاج لممارسة وتعلم وجمع معلومات ... 

فالبنات بتعتقد ان الكورس كل حاجه وانها بعد الكورس هتتحول لميكب ارتست .., احب ابشرك انه ده مش هيحصل عن تجربة 

, لازم تكملى بعد الكورس لانهم ببساطه بيدوكى القشور فقط وعليكى طبعا انك تمارسى المهنه وتعلمى نفسك وتشوفى كتيير وتطبقى هيه دى الطريقة الصحيحة اللى هتعلمك وكل واحدة ودرجة استيعابها 

* الشهادة : بجد متركزيش على حاجه اسمها شهادة لان مفيش حاجه اسمها معتمدة الا لو بتدرسى بالخارج فى بلد الموضة والفن وهما اصلا اللى عملوا العلم ده وبيدرسوه .. لكن الكلام اللى بنشوفه ده مش صحيح هيه كلها مغريات ليس الا 

فالاخر هتحصلى على شهادة فعلااا بس مش معتمدة مجرد شهادة مطبوعة وخلاص

* وسيشن التصوير بيجيبوا ناس مبتدئات فالتصوير علشان ميدفعوش فلوس وانتى وحظك او بيكون حد تعرفه فيجى يصورلك الموديل .. وحتى الموديل بينزلوا فرى مقابل الصور 

* هنسوقلك : التسويق ده قصته كبيرة .., هما كل اللى بيعملوه انهم بيعملوا صفحة على الفيس باسمك وفى ناس تانيه بتقولك الخطوات وانتى اعمليها " جزاكم الله خيراا الصراحة " 

 انا عن نفسى انصحك انك تتعلمى الاول وتعملى شغل كويس وبعدين ابدأى نزلى صور العرايس اللى عملتى ليهم ميكب وبعدها اعملى الصفحة ونزلى شغلك وممكن تدفعى فلوس للاعلان على الفيس بوك .., 

فى النهاية القرار بايدك ودى كانت تجربتى مع الموضوع وحبيت اشارككم بها وحطى فى بالك انك عشان تتعلمى اى حاجه لازم 

تجمعى معلومات وتذاكرى كويس وتطبقى وتسالى وترجعى تطبقى تانى ولازم تغلطى وتحاولى كتيير 

وبعدها شغلك هوه اللى هيتكلم عنك